Udhëheqësit e vendeve anëtare të Bashkimit Evropian, me përjashtim të Hungarisë, kanë miratuar një deklaratë të përbashkët ku theksojnë se populli ukrainas duhet të ketë lirinë për të vendosur vetë për të ardhmen e tij. Dokumenti u aprovua vonë të hënën dhe u publikua të martën, vetëm pak ditë para samitit të planifikuar të së premtes mes Donald Trump dhe Vladimir Putin në Alaskë.
Në deklaratë thuhet se negociatat kuptimplote “mund të zhvillohen vetëm në kontekstin e një armëpushimi ose reduktimi të armiqësive”, duke nënvizuar se çdo marrëveshje paqeje duhet të mbrojë interesat jetësore të sigurisë së Ukrainës dhe Evropës.
BE-ja mirëpriti përpjekjet e presidentit amerikan për t’i dhënë fund luftës së nisur nga Rusia, por paralajmëroi se pa Ukraina në tryezë nuk mund të ketë vendimmarrje për paqen. Trump ndërkohë ka konfirmuar se me Putinin do të diskutojë edhe për “shkëmbimin e territoreve”, ndërsa mbetet e paqartë nëse Ukraina do të marrë pjesë në samit.
Deklarata thekson se paqja e qëndrueshme duhet të respektojë të drejtën ndërkombëtare, pavarësinë, sovranitetin dhe integritetin territorial të Ukrainës, si dhe parimin se kufijtë nuk ndryshohen me forcë. BE-ja premton vazhdimin e mbështetjes politike, financiare, humanitare dhe ushtarake për Kievin, si dhe forcimin e sanksioneve kundër Federatës Ruse.
Sipas liderëve evropianë, një Ukrainë e aftë të mbrohet është thelbësore për garancitë e sigurisë në të ardhmen. BE-ja dhe shtetet anëtare shprehin gatishmërinë për të kontribuar në këto garanci, duke respektuar politikat dhe interesat e sigurisë të secilit vend anëtar.
Në fund, deklarata ripohon mbështetjen për rrugën e Ukrainës drejt anëtarësimit në Bashkimin Evropian dhe të drejtën e saj të lindur për të zgjedhur fatin e vet.
