Policia e Kosovës ka arrestuar një person të dyshuar për posedim të një sasie të konsiderueshme kokaine, gjatë një operacioni të zhvilluar nga Njësia Rajonale për Hetimin e Trafikimit me Narkotikë në Prizren, në bashkëpunim me Prokurorinë Themelore të qytetit.
Sipas njoftimit zyrtar, më 11 gusht 2025, në rrugën “Viljam Voker” në Prizren, është ndaluar i dyshuari me inicialet H.K. (1994), shtetas i Republikës së Kosovës.
Çfarë u sekuestrua gjatë kontrollit:
-
4 kg e 440 gram kokainë;
-
Dy peshore elektronike;
-
260 euro para të gatshme;
-
Një pajisje për vakumim të qeseve plastike;
-
Një motoçikletë Piaggio Vespa;
-
Një telefon mobil iPhone 15 Pro Max;
-
Një skalper;
-
Sasi e konsiderueshme e qeseve plastike për paketim.
Sipas vlerësimeve, droga e sekuestruar në tregun ilegal mund të arrijë vlerën deri në 300 mijë euro.
I dyshuari u shoqërua në Polici dhe u intervistua në prani të avokatit mbrojtës. Me vendim të prokurorit të shtetit, ai është ndaluar për 48 orë, ndërsa hetimet po vazhdojnë në koordinim me Prokurorinë Themelore të Prizrenit.
Policia e Kosovës theksoi se mbetet e përkushtuar në luftën kundër narkotikëve dhe ftoi qytetarët të raportojnë çdo informacion të dyshimtë tek organet e rendit.
