Sot, në orën 23:59, përfundon afati për aplikimin e subjekteve politike për certifikim dhe dorëzimin e listave me kandidatët që do të marrin pjesë në zgjedhjet lokale të 12 tetorit 2025. Qytetarët e Kosovës do të votojnë për Kryetarët e Komunave dhe për anëtarët e Kuvendeve Komunale.
Zëdhënësi i Komisionit Qendror të Zgjedhjeve (KQZ), Valmir Elezi, kujtoi se periudha e aplikimit ka nisur më 26 qershor dhe përfundon sonte në mesnatë. Sipas tij, subjektet politike kanë të drejtë të zgjedhin komunat ku duan të garojnë, si dhe llojin e garës – vetëm për Kryetar Komune, vetëm për Kuvend Komunal, ose për të dyja njëkohësisht.
“Subjektet politike kanë të drejtën e plotë të vendosin në cilat komuna do të marrin pjesë. Po ashtu, ato përcaktojnë vetë nëse do të garojnë vetëm për Kryetar Komune, vetëm për Kuvend Komunal, apo për të dyja”, tha Elezi.
Deri më tani, KQZ ka certifikuar grupin e parë prej 10 subjektesh politike, që përfshin 2 iniciativa qytetare dhe 8 kandidatë të pavarur. Në total, janë 64 kandidatë të certifikuar: 5 për Kryetarë Komunash dhe 59 për anëtarë të Kuvendeve Komunale.
