Agjencia për Menaxhimin e Emergjencave (AME) dhe Ministria e Punëve të Brendshme (MPB) kanë njoftuar se gjatë 12 orëve të fundit janë regjistruar gjithsej 61 vatra zjarri në vend. Nga to, 52 janë lokalizuar falë intervenimit të Njësive të Zjarrfikësve dhe strukturave mbështetëse, ndërsa 9 vatra mbeten ende aktive.
Menaxhimi i situatës po bëhet në koordinim të ngushtë me Njësitë e Zjarrfikjes, Qendrat Operative 112 dhe Policinë e Kosovës. Sipas vlerësimeve, situata paraqitet e menaxhueshme, pasi të gjitha vatrat aktive janë nën monitorim të vazhdueshëm dhe ekipet zjarrfikëse po veprojnë në terren.
AME/MPB ka shprehur mirënjohje për përkushtimin e zjarrfikësve, Policisë së Kosovës, KFOR-it, komunave dhe qytetarëve që kanë kontribuar në menaxhimin e zjarreve.
