Policia e Kosovës ka zhvilluar një ditë të ngjeshur operacionale, duke realizuar disa aksione që rezultuan në arrestimin e gjashtë personave të dyshuar për vepra të rënda penale, nga tentativa për vrasje, grabitje me dhunë, deri te përdorimi i armëve të zjarrit në ahengje.
Në një operacion të befasishëm në veri të Prishtinës, njësitë e STP Veriut arrestuan K.D., 35 vjeç, shtetas i Republikës së Kosovës, i kërkuar me urdhëresë gjykate për veprat penale “Vrasje e rëndë në tentativë” dhe “Mbajtje e paautorizuar e armëve”. Pas arrestimit, me vendim të prokurorit, i dyshuari u dërgua në mbajtje për 48 orë.
Ndërkohë, në Fushë Kosovë, rreth orës 01:00 të mëngjesit, policia arrestoi katër persona të dyshuar për një grabitje të kryer në rrugën “Nëna Terezë”. Sipas hetimeve, ata kishin përdorur sprej dhe forcë fizike për t’i marrë viktimës një çantë me para. Të arrestuarit janë identifikuar si D.R. (21 vjeç), E.S. (23 vjeç), R.B. (24 vjeç) dhe F.Sh. (21 vjeç), të cilët pas procedurave ligjore u dërguan në mbajtje për 48 orë.
Në një rast tjetër, po gjatë natës, policia reagoi ndaj një raportimi për të shtëna me armë zjarri në një restorant në fshatin Sibovc të Podujevës. Në vendngjarje, u sekuestrua një armë zjarri dhe u arrestua i dyshuari L.H., 24 vjeç, shqiptar i Kosovës, i cili kishte shtënë gjatë një ahengu familjar, duke rrezikuar sigurinë e të pranishmëve. Ai do të hetohet për “Përdorim i armës dhe mjetit të rrezikshëm” dhe “Mbajtje e paautorizuar e armëve”, ndërsa është dërguar në mbajtje për 48 orë.
Policia e Kosovës ka theksuar se operacionet e tilla do të vazhdojnë me qëllim rritjen e sigurisë publike dhe kapjen e personave që kërkohen nga drejtësia. Po ashtu, qytetarët janë paralajmëruar të shmangin përdorimin e armëve në ahengje, pasi këto veprime paraqesin rrezik serioz për jetën dhe rendin publik.
