Ministria e Arsimit, Shkencës, Teknologjisë dhe Inovacionit (MAShTI) ka njoftuar se nga sot ka nisur procesi i aplikimit për subvencionimin e teksteve shkollore dhe materialeve mësimore përmes platformës e-Kosova.
Për vitin shkollor 2025/2026, do të ndahen:
-
80 euro për nxënësit nga klasa I deri në klasën V, për blerjen e teksteve dhe materialeve mësimore;
-
80 euro për nxënësit nga klasa VI deri në klasën IX, për blerjen e fletoreve të punës dhe materialeve mësimore.
Tekstet shkollore për nxënësit e klasave VI-IX do të përdoren nga gjenerata e kaluar, sipas Udhëzimit Administrativ Nr. 13/2016, siç është praktikuar edhe vitin e kaluar.
Procesi i aplikimit është lehtësuar këtë vit, pasi llogaritë bankare të prindërve janë aktive nga vitet e kaluara. Ashtu si në dy vitet e fundit, mjetet financiare do të transferohen drejtpërdrejt në xhirollogaritë bankare të prindërve, pas verifikimit të aplikimit nga shkolla përkatëse.
MAShTI ka bërë të ditur se Drejtoritë Komunale të Arsimit janë informuar paraprakisht për procesin dhe verifikimet. Aplikimi bëhet online në këtë link: https://ekosova.rks-gov.net/Service/5
Ministria ka uruar një vit të mbarë e të suksesshëm shkollor për të gjithë nxënësit.
