Prokuroria Themelore në Pejë në bashkëpunim me Policinë e Kosovës ka zhvilluar një aksion në fshatin Isniq të komunës së Deçanit, ku u arrestuan 13 persona të dyshuar për veprimtari të paligjshme të bixhozit.
Sipas njoftimit zyrtar, të arrestuarit janë ndaluar për 48 orë nën dyshimin për veprën penale “Organizimi i skemave piramidale dhe bixhozit të kundërligjshëm” sipas Kodit Penal të Republikës së Kosovës.
Aksioni, i udhëhequr nga Kryeprokurorja e Prokurorisë Themelore të Pejës, Lumturije Vuçetaj, ka rezultuar edhe me sekuestrimin e rreth 17 mijë eurove, një armë zjarri, shufra metalike dhe thika. Po ashtu, janë konfiskuar edhe prova të tjera materiale që lidhen me veprimtarinë e dyshuar.
Prokuroria ka bërë të ditur se brenda afatit ligjor do të paraqesë kërkesë për masat e mëtejshme ligjore ndaj të pandehurve, në përputhje me dispozitat e Kodit të Procedurës Penale.
