Policia e Kosovës, përmes Drejtorisë për Hetimin e Krimit të Organizuar dhe Krimeve të Rënda, në bashkëpunim me Prokurorinë Themelore të Prishtinës, ka realizuar sot një operacion policor që ka rezultuar me arrestimin e dy personave të dyshuar për veprën penale të “fajdes”.
Të dyshuarit, të identifikuar me inicialet B.F. (1977) dhe A.F. (1986), dyshohet se përmes presioneve të vazhdueshme kanë detyruar një viktimë të paguante shuma të ndryshme parash si interes për fajde. Përveç kësaj, ata dyshohet se kanë tentuar të përfitojnë edhe njësi banesore në ndërtim që ishin në pronësi të viktimës.
Policia njofton se B.F. është arrestuar në flagrancë gjatë pranimit të parave, ndërsa A.F. është ndaluar në banesën e tij. Një i dyshuar tjetër, B.B. (1985), nuk është gjetur në shtëpi gjatë aksionit, por është lënë ftesë për paraqitje në polici.
Me urdhër të gjykatës, janë kontrolluar tre vendbanime të të dyshuarve, ku janë sekuestruar prova materiale që do të përdoren në procedurat penale.
Prokuroria Themelore e Prishtinës ka lëshuar aktvendim për ndalim ndaj B.F. dhe A.F., ndërsa hetimet ndaj personave të përfshirë po vazhdojnë.
