Njësia hetimore nga Departamenti i Kufirit i Policisë së Kosovës ka ndërhyrë sot rreth orës 20:30 gjatë një operacioni në zonën kufitare Kosovë-Shqipëri, pranë vijës së gjelbër, ku ka hasur një person të dyshuar i armatosur dhe me një çantë të dyshuar.
Sipas raportimeve zyrtare, i dyshuari ka drejtuar armën e zjarrit ndaj zyrtarëve policorë, duke paraqitur rrezik të drejtpërdrejtë për ta. Policia ka tentuar ta ndalojë, por i dyshuari ka hedhur çantën dhe është larguar në zonën malore drejt Shqipërisë.
Pas kontrollit të çantës, Njësia e Antidrogës ka konstatuar se brenda kishte rreth 21 kilogramë substancë të dyshuar narkotike, e tipit marihuanë.
Rasti është referuar Prokurorit kompetent, i cili ka urdhëruar iniciimin e hetimeve, ndërsa çështja po trajtohet nga Drejtoria për Hetimin e Trafiqeve të Narkotikëve (DHTN) – Prizren.
Ky operacion tregon përkushtimin e Policisë së Kosovës në parandalimin e trafikimit të lëndëve narkotike dhe garantimin e sigurisë në zonat kufitare.
