Partia Demokratike e Kosovës (PDK) ka deponuar sot një ankesë në Gjykatën Kushtetuese kundër vendimit të Zyrës së Rregullatorit të Energjisë (ZRRE), i cili detyron mbi 1,300 biznese të kalojnë në të ashtuquajturin treg të lirë të energjisë.
Deputeti i PDK-së, Abelard Tahiri, deklaroi se ky hap është ndërmarrë për të mbrojtur interesin publik, ekonominë e vendit dhe qindra mijëra vende të punës.
“Sapo deponuam kërkesën në Gjykatën Kushtetuese të Republikës së Kosovës për anulimin e vendimit të ZRRE-së, e cila në mënyrë të dhunshme nxjerr rreth 1,300 biznese në të ashtuquajturin treg të lirë, sepse treg të lirë të energjisë elektrike në Kosovë nuk ka”, tha Tahiri.
Ai theksoi se ky vendim, i cili është legjitimuar edhe nga Gjykata Themelore dhe Apeli, është në kundërshtim me rendin kushtetues dhe dëmton drejtpërdrejt ekonominë. Për këtë arsye, PDK i ka kërkuar Gjykatës Kushtetuese të marrë një masë të përkohshme për pezullimin e zbatimit të tij.
Tahiri shtoi se përfitues të këtij vendimi janë vetëm këshilltarë të afërt me kryeministrin Albin Kurti.
“Tashmë është një grup i ngushtë kriminal, që sillet rreth zyrës së kryeministrit, këshilltarë të kryeministrit, të cilët shesin energji elektrike. Bizneset janë të detyruara ta blejnë atë rreth 280 për qind më shtrenjtë se sa e paguanin deri para pak muajve”, u shpreh ai.
