Deputetja Donika Gërvalla ka mohuar kategorikisht të ketë qenë ndonjëherë dëshmitare në Gjykatën Speciale të Hagës, duke e cilësuar këtë si pjesë të një fushate denigruese kundër saj.
“Nuk kam pasur asnjë kontakt, as nuk kam dhënë dëshmi, as nuk jam dëshmitare në Gjykatën Speciale. Të gjitha këto janë shpifje për të baltosur personalitetin tim”, tha Gërvalla.
Ajo reagoi edhe ndaj akuzave se po paraqitet si “anti-UÇK”, duke theksuar se kontributi i saj në luftën çlirimtare ka qenë i prekshëm, qoftë si individ, qoftë përmes strukturave ku ka vepruar.
“Të gjithë ata që më sulmojnë si anti-UÇK duhet të mendojnë dy herë. Sepse kur unë kam kontribuar në luftë, disa të tjerë kanë qenë duke pirë qumësht”, u shpreh Gërvalla.
Deputetja theksoi se Gjykata Speciale ka trajtuar vetëm dëshmitarë të dorës së parë, prandaj çdo pretendim për rolin e saj në këtë proces, sipas saj, është i pabazë. “Pyetni avokatët e të akuzuarve”, shtoi ajo.
