Gjykata e Posaçme Kundër Korrupsionit dhe Krimit të Organizuar (GJKKO) ka rrëzuar kërkesën e ish-presidentit Ilir Meta për lehtësimin e masës së sigurisë, duke vendosur që ai të mbetet në qeli. Meta mbahet në paraburgim që prej tetorit të vitit të kaluar, pasi u mor i pandehur nga SPAK për aferën CEZ-DIA dhe çështjen e lobimit të LSI-së në SHBA.
Në vendimin e zbardhur, gjyqtari Erjon Çela argumenton se Meta paraqet rrezik të lartë për prishjen e provave dhe intimidimin e dëshmitarëve, ndryshe nga pretendimet e mbrojtjes.
“Gjykatat kanë vlerësuar se ekziston rrezik eminent që liria e pakushtëzuar e të pandehurit Ilir Meta të helmojë provat apo të rrezikojë gjetjen dhe fiksimin e tyre në gjendjen natyrore,” thuhet në vendim.
Sipas gjyqtarit Çela, për shkak të funksioneve që Meta ka pasur dhe pozicionit të tij politik, ai ka mundësi reale për të ushtruar ndikim mbi dëshmitarë dhe mbi procesin e mbledhjes së provave.
Gjykata thekson gjithashtu se pozita procedurale e Metës është rënduar, pasi nga një person nën hetim, tashmë ai është marrë zyrtarisht i pandehur, me akuza për korrupsion, pastrim parash dhe fshehje pasurie.
Më 4 gusht, SPAK komunikoi mbylljen e hetimeve dhe kalimin e dosjes në gjykatë, ndërsa Meta vijon të qëndrojë në paraburgim me masën e sigurisë “arrest në burg”.
