Deputeti Haxhi Avdyli ka reaguar ashpër duke e cilësuar si “dezertim politik” kalimin nga fjalimet demagogjike kundër Partisë Demokratike të Kosovës (PDK), Kadri Veselit, Hashim Thaçit dhe ShIK-ut, në bashkëpunim me ta.
Avdyli ka theksuar se kjo sjellje është e papranueshme, sidomos kur bëhet “kundër vajzës së Jusuf Gërvallës, aktivistes dhe koleges së idealit rugovian”. Ai rikujtoi se disa figura politike kishin deklaruar se “kur të përfundonin ata pas grilave, do ta linin politikën”, por sot janë ende aktivë dhe bashkëpunues me ta.
Sipas tij, qytetarët janë tradhtuar, pasi premtimet elektorale u zëvendësuan me interesa të pushtetit, duke u bërë bashkë “të kuq, të kaltër e të zinj”. Avdyli shtoi se Donika Gërvalla ka mbetur e palëkundur në parimet rugoviane, ndërsa të tjerët kanë braktisur idealet për interesa politike.
Në fund, ai ngriti pyetjen: “Tash kë do të akuzoni për vrasjet e pasluftës, kur edhe ato po rezultojnë se ishin vetëm për efekte elektorale?”
