Deputetja Jehona Lushaku-Sadriu ka ngritur akuza të rënda ndaj ministrit të Kulturës, Hajrulla Çeku, duke e cilësuar shpërndarjen e fondeve publike si keqpërdorim elektoral në prag të zgjedhjeve.
Sipas saj, ministri “i paligjshëm” po ndan mbi 4 milionë euro subvencione për tri vitet e ardhshme, përkatësisht për vitet 2025, 2026 dhe 2027. Ajo e ka quajtur këtë veprim të papranueshëm, duke theksuar se një ministër i përkohshëm nuk ka mandat të marrë vendime afatgjata.
Lushaku-Sadriu ka akuzuar Ministrinë për mungesë transparence, duke përmendur se listat e subvencioneve janë publikuar, fshirë dhe ndryshuar disa herë. “Një organizatë figuron dy herë, shumat ndryshojnë, dhe brenda natës janë shtuar edhe 38 organizata të reja”, tha ajo.
Deputetja e cilësoi këtë proces si “abuzim elektoral me paranë publike”, duke shtuar se qytetarët nuk duhet të shiten për “dhurata zgjedhore”.
“Kosova nuk është bankë e VV-së”, përfundoi ajo.
