Presidenti i Shteteve të Bashkuara, Donald Trump, ka deklaruar se shpreson të takohet me udhëheqësin e Koresë së Veriut, Kim Jong-un, brenda këtij viti.
“Kam një marrëdhënie të shkëlqyer me Kim Jong-un. Shpresoj që të mbetet kështu, mendoj se do të qëndrojë”, tha Trump para gazetarëve gjatë një takimi në Zyrën Ovale me presidentin e ri të Koresë së Jugut, Lee Jae-myung.
Duke kujtuar vizitën e tij në vitin 2019, kur kaloi kufirin në Zonën e Demilitarizuar midis dy Koreve, Trump u shpreh se ndonëse shumëkush e kritikoi atë hap, ai vetë ishte i sigurt.
“Ndihesha i sigurt sepse kam një marrëdhënie të shkëlqyer me Kim Jong-un. Kaloj shumë kohë duke folur me të për gjëra për të cilat ndoshta nuk duhet të flasim. Mendoj se ai udhëheq një vend me potencial të madh”, theksoi presidenti amerikan.
Nga ana e tij, presidenti i Koresë së Jugut, Lee, e inkurajoi Trumpin të vazhdonte përpjekjet për paqe dhe madje hodhi idenë e ndërtimit të një “Kulle Trump” në Korenë e Veriut.
Megjithëse Trump kishte kritikuar më herët Seulin në rrjetet sociale, duke folur për një “spastrimi ose revolucioni” të brendshëm, gjatë takimit tensionet u shuan. Lee e vlerësoi dekorin e Zyrës Ovale duke e cilësuar si simbol të prosperitetit amerikan, ndërsa shprehu mirënjohje për rolin e SHBA-së në sigurinë rajonale.
I pyetur për praninë e trupave amerikane në Korenë e Jugut, Trump nuk dha një përgjigje direkte, por sugjeroi se do të donte të ndryshonte kontratën e qirasë me Seulin për bazën ajrore të Osanit, një nga instalimet më të mëdha ushtarake amerikane në rajon.
“Do të doja të shihja nëse mund ta heqim dorë nga kontrata e qirasë dhe të marrim pronësinë e tokës ku kemi një bazë masive ushtarake”, tha Trump.
