Udhëheqësi i Koresë së Veriut, Kim Jong Un, do t’i bashkohet presidentit rus Vladimir Putin dhe dhjetëra liderëve të tjerë botërorë në paradën ushtarake që do të mbahet javën e ardhshme në Pekin. Ministria e Jashtme e Kinës ka konfirmuar pjesëmarrjen e tij, duke e cilësuar këtë si një dëshmi të “miqësisë tradicionale” mes dy vendeve.
Parada, e njohur si “Dita e Fitores”, do të shënojë 80-vjetorin e fitores së Kinës ndaj Japonisë dhe fundin e Luftës së Dytë Botërore. Në këtë ngjarje do të marrin pjesë 26 krerë shtetesh, ndërsa Kina do të ekspozojë arsenal të avancuar ushtarak, përfshirë qindra avionë, tanke dhe sisteme anti-dronë. Marshimi, i cili do të zgjasë rreth 70 minuta, do të udhëhiqet nga presidenti kinez Xi Jinping dhe do të zhvillohet në Sheshin Tiananmen me dhjetëra mijëra ushtarë kinezë dhe njësi veterane.
Pjesëmarrja e Kim Jong Un përbën një moment të rrallë diplomatik për Phenianin. Ky është takimi i tij i parë ndërkombëtar pas gjashtë vitesh, duke e rikthyer atë në skenën botërore përkrah Putinit dhe Xi-së. Në vitin 2015, në paradën e fundit të Ditës së Fitores, Koreja e Veriut ishte përfaqësuar vetëm nga zyrtarë të rangut të lartë.
Parada shihet gjithashtu si një manovër gjeopolitike e Pekinit, në kohën kur presidenti amerikan Donald Trump ka shprehur interes të takohet sërish me Kim dhe të arrijë një marrëveshje me Putinin për konfliktin në Ukrainë. Pekini duket i vendosur të tregojë se mbetet një lojtar kyç në ekuilibrat globalë.
Ndërkohë, pritet me interes nëse presidenti i Koresë së Jugut, Lee Jae Myung, do t’i përgjigjet ftesës së Kinës. Një pjesëmarrje e tij mund të ofronte mundësinë e parë për një takim me Kim Jong Un pas ngrirjes së marrëdhënieve në vitin 2019. Megjithatë, dilema mbetet e madhe, pasi Seuli rrezikon që një injorim publik nga Kim-i apo një shfaqje pranë Putinit e udhëheqësve të tjerë autoritarë të shihet si një lëvizje e papërshtatshme.
Shumica e liderëve perëndimorë nuk pritet të marrin pjesë, duke protestuar ndaj pranisë së Putinit dhe luftës në Ukrainë. Japonia gjithashtu ka kritikuar eventin, duke e cilësuar si një ngjarje me “ngjyrime anti-japoneze”.
Parada në Pekin pritet të ndiqet me vëmendje nga fuqitë botërore, jo vetëm për spektaklin ushtarak, por edhe për mesazhin politik që Kina dhe aleatët e saj synojnë të dërgojnë në një kohë tensioni të lartë global.
