Ukraina është goditur sërish nga bombardime të rënda ruse gjatë natës, duke shkaktuar viktima e shkatërrime të mëdha. Zyrtarët ukrainas konfirmuan se tre persona kanë humbur jetën, mes tyre një vajzë 14-vjeçare, ndërsa të paktën 24 të tjerë kanë mbetur të plagosur.
Kryebashkiaku i Kievit, Vitali Klitschko, tha se sulmi ishte “masiv”, duke shënjestruar më shumë se 20 lagje të kryeqytetit. Një ndërtesë pesëkatëshe u shemb në lagjen Darnytski, ndërsa një zjarr shpërtheu në një objekt banimi në lagjen Dnipro. Mes goditjeve, flakët përfshinë edhe një kopsht fëmijësh.
Sipas presidentit Volodymyr Zelensky, mbi 100 mijë shtëpi kanë mbetur pa energji elektrike pas valës së fundit të sulmeve me dronë ndaj infrastrukturës energjetike.
Tymur Tkachenko, kreu i administratës ushtarake të Kievit, tha se përveç vajzës së mitur që humbi jetën, pesë fëmijë të tjerë janë plagosur.
Përpjekje për armëpushim
Tre vjet e gjysmë pas nisjes së pushtimit rus, luftimet nuk po japin shenja qetësimi. Përpjekja më e fundit ndërkombëtare për një armëpushim u lançua nga presidenti amerikan Donald Trump, i cili këtë muaj është takuar në Alaska me homologun rus Vladimir Putin, ndërsa në Uashington është mbajtur takim me Zelensky dhe liderë evropianë.
Trump ka kërkuar një samit Putin–Zelensky, të cilin presidenti ukrainas e ka mbështetur, por me kusht që aleatët perëndimorë të ofrojnë garanci sigurie për të parandaluar sulme të reja ruse.
Ndërkohë, Zelensky është takuar në Kiev me kreun e forcave të armatosura britanike, admiralin Sir Tony Radakin, ku është diskutuar për mundësitë e përfundimit të luftës. I dërguari special i SHBA-së, Steve Witkoff, ka njoftuar se këtë javë do të zhvillojë bisedime me përfaqësues ukrainas në Nju Jork, duke theksuar se “kontaktet me rusët janë të përditshme”.
Shefja e diplomacisë së BE-së, Kaja Kallas, paralajmëroi se çdo dorëzim territori ndaj Rusisë në emër të paqes do të ishte një “kurth”.
