Presidentja e Komisionit Evropian, Ursula von der Leyen, ka zhvilluar një bisedë telefonike me Presidentin e SHBA-së, Donald Trump, dhe homologun ukrainas Volodymyr Zelenskyy, pas sulmit të fundit rus ndaj Kievit që shkaktoi dhjetëra viktima dhe dëme serioze, përfshirë edhe godinën e delegacionit të BE-së.
Në një reagim në platformën “X”, Von der Leyen theksoi se Ukraina duhet të marrë “garanci të forta dhe të besueshme sigurie që do ta shndërrojnë vendin në një iriq të çelikut”. Ajo shtoi se Evropa do të luajë plotësisht rolin e saj në këtë proces, ndërsa i bëri thirrje presidentit rus Vladimir Putin të “vijë në tryezën e negociatave”.
Sulmi mbi zyrat e BE-së në Kiev
Ambasadorja e BE-së në Ukrainë, Katarina Mathernova, konfirmoi se ndërtesa e delegacionit evropian në Kiev u “dëmtua rëndë nga vala e shpërthimit” të raketave dhe dronëve rusë. Fatmirësisht, asnjë anëtar i stafit nuk u lëndua.
Ministri i Jashtëm i Ukrainës, Andrii Sybiha, e cilësoi sulmin si shkelje flagrante të Konventës së Vjenës, duke akuzuar Rusinë për “shënjestrim të qëllimshëm të diplomatëve”. Ndërkaq, shefja e diplomacisë evropiane, Kaja Kallas, e quajti këtë akt “një provokim të qëllimshëm për të përshkallëzuar dhe tallur përpjekjet për paqe”, duke paralajmëruar se ambasadori rus në Bruksel do të thirret për sqarime.
Trump dhe përpjekjet për paqe
Sulmi vdekjeprurës ndodhi pavarësisht përpjekjeve të fundit të presidentit amerikan Donald Trump për të ndërmjetësuar një marrëveshje paqeje, përfshirë samitet e mbajtura në Alaska dhe Uashington me udhëheqësit rusë dhe ukrainas. Por, Kremlini ka refuzuar të lëvizë nga kërkesat e tij maksimaliste, që përfshijnë heqjen dorë nga territore të gjera në Donbas dhe zotimin se Ukraina nuk do t’i bashkohet kurrë NATO-s.
Turneu diplomatik i Von der Leyen
Presidentja e Komisionit Evropian pritet të vizitojë shtatë shtete anëtare të BE-së që kufizohen me Rusinë në ditët në vijim. Ky tur diplomatik synon forcimin e unitetit të bllokut ndaj agresionit rus dhe mbështetjen e Ukrainës në fazën e re të konfliktit.
