Marrëveshja tregtare mes Bashkimit Evropian dhe Shteteve të Bashkuara ka shkaktuar përplasje të ashpra në Parlamentin Evropian, ku eurodeputetët pritet ta sfidojnë Komisionin Evropian gjatë një seance dëgjimore të mërkurën.
Shefja e tregtisë së Komisionit dhe negociatorja kryesore, Sabine Weyand, do të përballet me kritika të forta nga eurodeputetët, të cilët e cilësojnë marrëveshjen si të padrejtë dhe asimetrike.
“Nuk mund të pranojmë një marrëdhënie tregtare të pabalancuar me partnerët tanë amerikanë. Në formën aktuale, kjo marrëveshje është e papranueshme,” tha eurodeputeti italian Brando Benifei (S&D) për Euronews.
Komisioni Evropian ka propozuar uljen e tarifave për shumicën e mallrave industriale dhe disa produkte bujqësore amerikane në 0%, ndërsa eksportet evropiane drejt SHBA-së do të përballen me tarifa deri në 15%. Propozimi duhet të kalojë për miratim në Parlament dhe në Këshillin e BE-së.
Kritikë nga të gjitha anët politike
Të Gjelbrit, Socialistët, por edhe disa eurodeputetë të qendrës së djathtë kanë ngritur shqetësime. Eurodeputetja gjermane Anna Cavazzini (Të Gjelbrit) tha se marrëveshja ka “disavantazhe të mëdha për BE-në” dhe se “premtimet për stabilitet janë një iluzion, përballë kërcënimeve të vazhdueshme të SHBA-së me tarifa”.
Edhe brenda grupit më të madh, PPE-së, nuk ka unitet. Eurodeputetja franceze Celine Imart e quajti marrëveshjen “një kapitullim të plotë”, duke shtuar:
“Po premtojmë miliarda dollarë për blerjen e çipave dhe pajisjeve ushtarake amerikane, ndërsa u japim tarifa zero SHBA-së, vetëm për riindustrializimin e tyre.”
Nga ana tjetër, eurodeputeti suedez Jörgen Warborn (PPE) mbajti një ton më të kujdesshëm, duke e përshkruar marrëveshjen si “jo aq të ekuilibruar sa duhet, por të nevojshme për stabilitet”.
Trump rrit tensionet
Menjëherë pas marrëveshjes, presidenti amerikan Donald Trump kërcënoi me tarifa shtesë ndaj vendeve që miratojnë ligje të reja dixhitale, duke përfshirë BE-në, duke akuzuar Brukselin se po godet kompanitë amerikane të teknologjisë.
Eurodeputetja franceze Marie-Pierre Vedrenne (Renew) tha se ekziston një ndjenjë e përgjithshme se BE-ja “dështoi të vendoste ndonjë ndikim real në tryezë”.
E ardhmja e marrëveshjes në pikëpyetje
Marrëveshja BE-SHBA, e promovuar nga Komisioni si një hap drejt stabilitetit tregtar, po shihet nga shumë eurodeputetë si një kompromis i rrezikshëm, që i jep përparësi interesave amerikane në kurriz të industrisë dhe bujqësisë evropiane.
Seanca dëgjimore e së mërkurës pritet të jetë një test politik vendimtar për fatin e marrëveshjes në Parlamentin Evropian.
