Dogana e Kosovës ka zbuluar dhe konfiskuar një sasi të konsiderueshme narkotikësh gjatë kontrollit rutinë të dërgesave postare në Qendrën Doganore të Postës, më 3 shtator 2025.
Gjatë inspektimit të një pakoje të dyshimtë me prejardhje nga jashtë vendit, zyrtarët doganorë gjetën dy qese plastike të mbushura me substancë të blertë, e cila pas verifikimit u konfirmua se ishte marihuanë, me peshë rreth 1 kilogram.
Sipas protokolleve zyrtare, rasti iu raportua menjëherë autoriteteve të sigurisë dhe u mor në dorë nga Njësia Anti-Drogë e Policisë së Kosovës. Materialet e sekuestruara tashmë janë dorëzuar për procedurat e mëtejshme penale.
Dogana e Kosovës deklaroi se ky rast është dëshmi e efektivitetit të kontrolleve doganore dhe bashkëpunimit të ngushtë me institucionet e sigurisë, duke ritheksuar angazhimin për të mbrojtur qytetarët nga hyrja e substancave të ndaluara në vend.
