Udhëheqësit perëndimorë u mblodhën të enjten në Paris në një samit për Ukrainën, ku zhvilluan bisedime me presidentin Volodymyr Zelenskyy dhe të dërguarin amerikan Steve Witkoff, mbi garancitë e sigurisë që mund të ofrohen në rast të një marrëveshjeje paqeje me Rusinë.
Samiti bashkoi liderë nga Evropa, Australia, Japonia dhe Kanadaja, ndërsa në fokus ishte diskutimi për vendosjen e trupave të koalicionit ndërkombëtar në Ukrainë, për të garantuar zbatimin e çdo marrëveshjeje të ardhshme. Megjithatë, paqartësitë mbeten të mëdha, sidomos për shkak të ngurrimit të presidentit amerikan Donald Trump për të angazhuar trupa dhe kundërshtimit të ashpër të Moskës ndaj pranisë së forcave të huaja.
Franca dhe Mbretëria e Bashkuar, të cilat po udhëheqin nismën, shpresojnë ta bindin Uashingtonin që të mbështesë planin dhe të garantojë mbështetje ushtarake për Kievin. Para samitit, i dërguari amerikan Witkoff u takua me diplomatë evropianë, ndërsa Sekretari i Përgjithshëm i NATO-s, Mark Rutte, theksoi se Rusia nuk ka të drejtë të diktojë vendosjen e trupave në një vend sovran.
“Pse duhet të na interesojë çfarë mendon Rusia për trupat në Ukrainë? Ukraina është shtet sovran. Nëse dëshiron forca garantuese për një marrëveshje paqeje, kjo është e drejta e saj”, tha Rutte në Pragë.
Një ditë më parë, presidenti francez Emmanuel Macron deklaroi në krah të Zelenskyy-t se vendet e koalicionit janë të gatshme të ofrojnë garanci sigurie sapo të arrihet një paqe e nënshkruar. “Ne, evropianët, jemi gati. Tani mbetet të shihet sa e sinqertë është Rusia për t’i dhënë fund luftës”, tha Macron.
Sipas burimeve diplomatike, planet teknike për garancitë tashmë janë përfunduar dhe shefat e ushtrive britanike e franceze i prezantuan ato gjatë samitit. Por liderët evropianë pranuan se çdo vendosje trupash do të jetë e realizueshme vetëm me mbështetjen e SHBA-së.
Ndërkohë, presidenti rus Vladimir Putin deklaroi të mërkurën se ekziston një mundësi për t’i dhënë fund luftës përmes negociatave “nëse mbizotëron arsyeja e shëndoshë”, por paralajmëroi se është i gatshëm ta çojë luftën deri në fund me forcë, nëse kjo mbetet e vetmja alternativë.
