Lidhja Demokratike e Kosovës (LDK) ka reaguar ashpër pas vendimit të Gjykatës Kushtetuese për pezullimin e procedurave të formimit të Qeverisë, duke e cilësuar këtë situatë si një tjetër bllokadë që po e paralizon vendin.
Në komunikatën e publikuar, LDK thotë se Kosova ka humbur edhe 30 ditë të tjera pa institucione funksionale, pa ligje dhe pa projekte që ecin përpara. “Një shtet i tërë i bllokuar për një pozitë të parëndësishme partiake në Kuvendin e Kosovës. Padituria kushton,” theksohet në reagim.
Sipas LDK-së, kjo krizë është pasojë e “popullizmit dhe shkeljes së Kushtetutës 48 herë rresht nga ata që nuk e kanë për synim shtetin, por vetëm karrigen dhe kauzën elektorale”. Partia kritikon ashpër kundërshtarët politikë, duke i akuzuar për mungesë idesh dhe përballje me skandale korruptive.
“LDK është e saktë sepse e kupton shtetin. Çdo pozicion i yni që nga shkurti e deri më sot ka qenë me kuptim shtetar dhe kushtetues. Përballja me popullizmin nuk është e lehtë, por mbetet e paalternativë. Besimi ynë në Republikë dhe demokraci do të na udhëheqë,” thuhet më tej në komunikatë.
LDK përmbyll reagimin me një mesazh politik të qartë: “Koha e shkatërruesve të shtetit duhet dhe po mbaron.”
