Kryeministri në detyrë i Kosovës, Albin Kurti, dhe kryetari i Komunës së Podujevës, Shpejtim Bulliqi, kanë vendosur sot gurthemelin e Kuzhinës Qendrore në Podujevë, një investim prej 700 mijë eurosh, që do t’u shërbejë mbi 10 mijë fëmijëve nga çerdhet, parashkollorët dhe klasat I-IX. Objekti me sipërfaqe 1150 m² do të përfshijë sallën e restorantit, hapësirat për staf e administratë dhe dhomat përcjellëse.
Në të njëjtën ditë, Kurti dhe Bulliqi përuruan edhe dy çerdhe të reja:
-
Në Kërpimeh, një ish-shkollë e adaptuar në çerdhe moderne përmes një investimi prej 200 mijë eurosh, me hapësirë prej 460 m² që ofron tri dhoma edukimi, një dhomë gjumi dhe kuzhinë.
-
Në Orllan, një investim prej 12 mijë eurosh brenda Shkollës Fillore “Zahir Pajaziti”, i cili ofron kushte për edukim, ushqim dhe fjetje.
Kurti e cilësoi projektin e Kuzhinës Qendrore si një hap për rritjen e mirëqenies së fëmijëve, duke theksuar se mësimnxënia lidhet ngushtë me ushqimin dhe kujdesin. Ndërsa Bulliqi tha se kjo është përgatitja e parë për të kaluar drejt mësimit gjithëditor në Podujevë dhe veçoi faktin se komuna ka kaluar nga një çerdhe publike në nëntë të tilla gjatë mandatit të tij.
