Qeveria e Moldavisë dhe Bashkimi Evropian kanë ngritur alarmin për një fushatë ruse të dezinformimit dhe përçarjes përpara zgjedhjeve parlamentare të 28 shtatorit, ku një rol kyç dyshohet se po luan edhe Kisha Ortodokse e lidhur me Patriarkanën e Moskës.
Sipas autoriteteve në Kishinau, Rusia po përdor mekanizma të ndryshëm të luftës hibride për të ndikuar në orientimin gjeopolitik të vendit, përfshirë edhe Kishën Ortodokse Ruse, e cila ka një prani të fortë në Moldavi. Ekspertët e sigurisë thonë se përmes saj po përhapet propagandë pro-Moskës dhe po organizohen fushata destabilizuese.
Daniel Vodă, zëdhënës i qeverisë moldave, tha se janë identifikuar dhjetë fusha kryesore të ndërhyrjes ruse, përfshirë përdorimin e kishës për propagandë politike. Komisioni Qendror i Zgjedhjeve ka paralajmëruar se disa priftërinj janë kapur të përfshirë në aktivitete politike, gjë që bie ndesh me ligjin.
Analisti Andrei Curăraru nga OJQ-ja WatchDog thekson se objektivi i Moskës është të ndalojë përgjithmonë anëtarësimin e Moldavisë në BE:
“Kisha Metropolitane e Moldavisë, nën autoritetin e Patriarkanës së Moskës, është shndërruar në një armë gjeopolitike për të ndikuar mbi mendjet dhe votat e besimtarëve”, tha ai.
BE-ja e kujdesshme, Moldavia kërkon ndarje nga Ukraina
Nga Brukseli, zgjedhjet e ardhshme shihen si vendimtare: një fitore e partive pro-ruse mund të ngrijë procesin e integrimit evropian të Moldavisë, një skenar i ngjashëm me Gjeorgjinë vitin e kaluar.
Presidentja Maia Sandu ka kërkuar që Moldavia të ecë e ndarë nga Ukraina në procesin e anëtarësimit, por BE-ja mbetet e rezervuar. Komisionerja për Zgjerim, Marta Kos, deklaroi se Moldavia i ka përmbushur kriteret teknike, por mbetet të sigurohet mbështetja politike e shteteve anëtare.
Ndërkohë, Presidenti i Këshillit të BE-së, António Costa, tha se negociatat para-anëtarësimit me Moldavinë pritet të hapen pas zgjedhjeve.
Më 9 shtator, presidentja Sandu do të flasë në Parlamentin Evropian në Strasburg, ku pritet të paralajmërojë për ndërhyrjen ruse dhe të kërkojë mbështetje për nisjen e bisedimeve të pranimit.
