Një incident i pazakontë ka ndodhur në Detin e Kuq, ku prerjet e kabllove nënujore kanë shkaktuar ndërprerje të aksesit në internet në disa vende të Azisë dhe Lindjes së Mesme. Ekspertët konfirmuan të dielën se ende nuk është e qartë se çfarë e shkaktoi dëmtimin.
Prej muajsh ka pasur shqetësime se kabllot mund të ishin objektiv i rebelëve Huthi në Jemen, të cilët i përdorin sulmet e tyre si presion mbi Izraelin që të ndalë luftën kundër Hamasit në Rripin e Gazës. Megjithatë, rebelët Huthi kanë mohuar të kenë sulmuar kabllot në të kaluarën.
Microsoft paralajmëroi në një njoftim zyrtar se Lindja e Mesme mund të përjetojë vonesa në lidhje, për shkak të ndërprerjeve në fibrat nënujore të Detit të Kuq. Kompania nuk dha detaje të hollësishme, por siguroi se trafiku i internetit që nuk kalon përmes Lindjes së Mesme nuk ndikohet.
Organizata NetBlocks, e cila monitoron qasjen në internet në nivel global, raportoi se ndërprerjet kanë prekur vende si India dhe Pakistani, duke përmendur probleme me sistemet kabllore SMW4 dhe IMEWE, pranë brigjeve të Xhedës në Arabinë Saudite.
Kablloja SMW4 drejtohet nga kompania indiane Tata Communications, ndërsa IMEWE është nën menaxhimin e një konsorciumi të udhëhequr nga Alcatel-Lucent. Asnjëra prej kompanive nuk ka komentuar ende publikisht. Po ashtu, Pakistan Telecommunications Co. Ltd. ka konfirmuar zyrtarisht ndërprerjen.
Autoritetet saudite dhe ato të Emirateve të Bashkuara Arabe nuk e kanë pranuar zyrtarisht defektin. Megjithatë, përdoruesit në Dubai dhe Abu Dhabi raportuan shpejtësi shumë më të ngadalta në rrjetet shtetërore Du dhe Etisalat.
Ekspertët kujtojnë se kabllot nënujore mund të priten aksidentalisht nga spirancat e anijeve, por gjithashtu mund të shënjestrohen edhe në sulme të qëllimshme.
