Presidentja e Republikës së Kosovës, Vjosa Osmani, priti sot në takim ambasadorin e Mbretërisë së Arabisë Saudite në Kosovë, Faisal Ghazi Ismail Hifzi.
Gjatë takimit u diskutua për forcimin e marrëdhënieve bilaterale mes dy vendeve, me fokus në nxitjen e investimeve ekonomike në Kosovë, mbështetjen ndërkombëtare nga Arabia Saudite dhe rritjen e bashkëpunimit mes qytetarëve.
Presidentja Osmani shprehu mirënjohje për mbështetjen e vazhdueshme të Arabisë Saudite dhe theksoi përkushtimin e Kosovës për ta çuar përpara këtë miqësi.
Ambasadori Hifzi i dorëzoi Presidentes Osmani një ftesë nga Princi i Kurorës dhe Kryeministri i Arabisë Saudite, Mohammed bin Salman bin Abdulaziz Al Saud, për të marrë pjesë në forumin ndërkombëtar “Future Investment Initiative”, i cili do të mbahet në Riad.
Presidentja Osmani e falënderoi për ftesën dhe ritheksoi gatishmërinë për të punuar ngushtë me Arabinë Saudite në funksion të thellimit të bashkëpunimit dypalësh.
