Fabrikat e Jaguar Land Rover (JLR) në Mbretërinë e Bashkuar pritet të mbeten të mbyllura të paktën deri të mërkurën, pasi kompania u godit nga një sulm kibernetik pak më shumë se një javë më parë.
Uzinat në Halewood dhe Solihull, fabrika e motorëve në Wolverhampton, si dhe fabrikat e prodhimit në Sllovaki, Kinë dhe Indi, nuk kanë funksionuar që kur JLR ra viktimë e sulmit. Stafi i linjave të prodhimit është udhëzuar të qëndrojë në shtëpi.
JLR mbylli sistemet e saj IT më 31 gusht për t’i mbrojtur ato nga dëmtimet, gjë që shkaktoi ndërprerje të mëdha në prodhim. Kompania deklaroi se po punon intensivisht për të rinisur rrjetet e saj në mënyrë të kontrolluar dhe të sigurt, në bashkëpunim me specialistë të sigurisë kibernetike dhe autoritetet ligjore.
Të enjten e kaluar, stafi u udhëzua të qëndrojë në shtëpi deri të martën, ndërsa kompania vazhdon të përballet me pasojat e sulmit. JLR, në pronësi të Tata Motors të Indisë, nuk ka komentuar mbi raportet se ndërprerjet mund të zgjasin për disa javë.
Në rrethana normale, kompania ndërton rreth 1,000 makina në ditë, ndërprerja e prodhimit ka pasur ndikim të rëndësishëm te furnizuesit, disa prej të cilëve kanë udhëzuar stafin e tyre të mos shkojë në punë. Përveçse ndaloi prodhimin, sulmi pengoi regjistrimin e makinave të reja dhe porositjen e pjesëve për mirëmbajtje, megjithëse janë vënë në përdorim zgjidhje alternative.
Sulmi ndodhi në një periudhë të njohur për konsumatorët për të marrë automjetet e reja, me grupin e fundit të targave të reja që u bë i disponueshëm të hënën, 1 shtator.
Shaun Adams, menaxher i furnizuesit të pjesëve Qualplast, i tha BBC-së se një mbyllje e gjatë është “shqetësuese” për biznesin. Ai shtoi:
“Nëse kjo vazhdon javëve të ardhshme, do të duhet të shqyrtojmë seriozisht përgatitjet për të ardhmen.”
Një grup hakerësh i ri, i cili ka qenë pas sulmeve ndaj kompanive në Mbretërinë e Bashkuar, përfshirë M&S këtë vit, ka marrë përgjegjësinë për sulmin ndaj JLR. Pak ditë pas sulmit, grupi postoi pretendimet e tij në Telegram, duke sugjeruar se kishte fituar qasje në informacione të ndjeshme.
Ekspertët e sigurisë spekuluan se sulmuesit po përpiqeshin të zhvasin para nga kompania. JLR konfirmoi për BBC-në se ishte në dijeni të pretendimeve dhe po i heton ato.
