Sekretari amerikan i Mbrojtjes, Pete Hegseth, dhe kryetari i Shtabit të Përbashkët, gjenerali Dan Caine, realizuan një vizitë të paparalajmëruar në Porto Riko të hënën. Ky është udhëtimi i parë i nivelit të lartë të Pentagonit në territorin amerikan që nga përshkallëzimi i grumbullimit ushtarak në Karaibe, mes rritjes së tensioneve me Venezuelën.
Dy zyrtarët u pritën nga guvernatorja e Porto Rikos, Jenniffer Gonzalez, e cila publikoi fotografi të takimit në platformën X. Pentagoni nuk ka dhënë asnjë koment mbi arsyet e vizitës, ndërsa gazetarëve nuk iu ofrua asnjë shpjegim zyrtar.
“Falënderojmë Presidentin Trump dhe Administratën e tij për njohjen e vlerës strategjike që Porto Riko ka për sigurinë kombëtare të SHBA-së dhe luftën kundër karteleve të drogës në hemisferën tonë, të përjetësuar nga narko-diktatori Nicolas Maduro,” shkroi Gonzalez në rrjetin social.
Vizita vjen pas vendimit të administratës Trump për të vendosur dhjetë avionë luftarakë F-35 në një aeroport të Porto Rikos, të cilët do të përdoren në operacione kundër karteleve të drogës. Ndërkohë, burime kanë bërë të ditur për Reuters se prania ushtarake amerikane në Karaibet jugore është forcuar ndjeshëm, në kuadër të premtimit të Trump për të goditur rrjetet e trafikimit të drogës.
Javën e kaluar, një sulm amerikan në Karaibe la të vrarë 11 persona dhe fundosi një anije me origjinë nga Venezuela, që sipas presidentit Trump transportonte narkotikë të paligjshëm. Nga ana tjetër, presidenti venezuelas Nicolas Maduro ka hedhur poshtë akuzat, duke pretenduar se SHBA synon ta rrëzojë atë nga pushteti.
Ndërkohë, gjatë vizitës në Porto Riko, Hegseth dhe Caine ndoqën nga afër stërvitjet amfibe dhe operacionet ajrore të Njësisë së 22-të Ekspedicionare Detare amerikane, të cilat po zhvillohen në jug të ishullit.
