Kryeministri i Shqipërisë, Edi Rama, pritet të shpallë nesër emrat e kabinetit të tij të ri qeveritar, duke hyrë kështu në mandatin e katërt radhazi në krye të vendit.
Një vëzhgim i Report TV dhe Shqiptarja.com tregon se gjatë tre mandateve të para, Rama ka kryer plot 42 ndryshime në përbërjen e qeverisë së tij. Nga viti 2013, kur mori drejtimin e ekzekutivit, e deri më sot, kryeministri ka përdorur kabinetin si një trampolinë për promovimin e figurave të reja, ndërsa shumë prej tyre nuk i kanë rezistuar kohës dhe janë larguar nga skena politike.
Në mandatin e parë (2013–2017), ndryshimet nisën që në vitin e parë, me dorëheqjen e Ilirjan Celibashit. Në vitet që pasuan, figura si Erion Veliaj, Saimir Tahiri, Ilir Beqaj dhe Bledi Çuçi u larguan nga kabineti, ndërsa emra të rinj si Ogerta Manastirliu, Olta Xhaçka dhe Fatmir Xhafaj hynë në skenë.
Mandati i dytë (2017–2021) solli 15 ndryshime të tjera, duke përfshirë dorëheqjen e Fatmir Xhafajt dhe një valë të gjerë rotacionesh pas protestave studentore në vitin 2018. Emra nga Kosova, si Gent Caka dhe Besa Shahini, u përfshinë për herë të parë në qeverinë shqiptare, ndërsa Olta Xhaçka u shfaq si një nga figurat më jetëgjata.
Në mandatin e tretë (2021–2025), Rama ndërmori 17 ndërhyrje, duke larguar ministra kyç si Arben Ahmetaj, Bledi Çuçi dhe Niko Peleshi. Edhe në këtë mandat, kabineti është prekur disa herë nga rotacionet e papritura, me hyrjen e figurave të reja si Blendi Gonxhe, Adea Pirdeni, Ervin Hoxha, Petrit Malaj dhe Pirro Vengu.
Në total, vetëm një grusht i vogël ministrash kanë mbetur “të paprekshëm” gjatë 12 viteve, mes tyre Mirela Kumbaro, Ogerta Manastirliu, Bledi Çuçi, Arben Ahmetaj dhe Niko Peleshi.
Raporti thekson se mandati i tretë ishte ai me më shumë lëvizje, ndërsa nesër pritet të zbardhen emrat e kabinetit të ri që do ta shoqërojë Ramën në mandatin e katërt.
Burimi: Report TV / Shqiptarja.com
