Nënkryetari i LDK-së, Lutfi Haziri, ka reaguar përmes një postimi në Facebook, duke theksuar se Kuvendi i Republikës së Kosovës është organi më i lartë kushtetues dhe askush nuk ka të drejtë të ndërhyjë në sovranitetin e tij.
“Kuvendi është ai që zgjedh presidentin, gjyqtarët e Gjykatës Kushtetuese dhe qeverinë. Të tjerët duhet t’i nënshtrohen Kuvendit, e jo e kundërta”, ka shkruar Haziri.
Ai e ka cilësuar si “të paprecedentë” sulmin e adresuar ndaj Gjykatës Kushtetuese para presidentes, duke paralajmëruar se një qasje e tillë ka hapur rrugë për sulme të tjera ndaj gjyqtarëve me mbiemra të veçantë, të cilët – siç theksoi ai – janë autoritete të zgjedhura nga Kuvendi me të njëjtën procedurë dhe mandat.
Haziri po ashtu ka shtuar se beson se presidentja Vjosa Osmani, në rrugëtimin e saj politik, ka qenë shpesh me “duar të lidhura”, pavarësisht se ka premtuar të jetë gardiane e pakompromis e Kushtetutës.
“Republika, mbi të gjithë!”, ka përfunduar reagimin e tij Haziri.
