Britania e Madhe dhe Shtetet e Bashkuara kanë rifilluar bisedimet mbi tarifat e çelikut dhe aluminit, vetëm pak ditë para vizitës shtetërore të presidentit amerikan Donald Trump në Londër. Negociatat, të cilat kishin ngecur gjatë verës, kanë marrë sërish hov këtë shtator, me synimin për të arritur një marrëveshje mbi kuotat që do të lehtësonin tarifat aktuale prej 25 përqind.
Vizita e Trump shihet nga zyrtarët britanikë si një mundësi kyçe për të arritur përparim jo vetëm në heqjen ose uljen e tarifave doganore, por edhe për të forcuar partneritetin teknologjik mes dy vendeve. Megjithatë, çështja është mjaft e ndjeshme politikisht për qeverinë laburiste të Keir Starmer, e cila përballet me presion në zonat industriale të vendit.
Ekspertët vlerësojnë se marrëveshja e mundshme do të mundësonte eksportin e sasive të caktuara të çelikut dhe aluminit britanik drejt SHBA-së me tarifa dukshëm më të ulëta. Por pengesa mbeten rregullat strikte amerikane që kërkojnë që metali të jetë shkrirë dhe derdhur në vendin e origjinës – një sfidë për industrinë britanike, sidomos pas mbylljes së fabrikës Port Talbot të Tata Steel.
“Vizita e Trump është mundësia ideale për një njoftim politik dhe ekonomik për industrinë e çelikut”, thanë burime pranë negociatave, ndërsa përfaqësues të qeverisë britanike konfirmuan përkushtimin për të arritur një marrëveshje sa më shpejt.
Burimi: Politico
