Ish-zëvendëskryeministri Fatmir Limaj ka reaguar fuqishëm në Facebook lidhur me pezullimin e Dialogut Strategjik nga Shtetet e Bashkuara, duke e cilësuar këtë si një nga goditjet më të rënda për Kosovën në 25 vitet e fundit.
Limaj thekson se raportet me SHBA-të nuk janë thjesht çështje politike, por një amanet i brezit që solli lirinë dhe shtetin. “Ky është sinjal i qartë se besimi me aleatin tonë jetik është cenuar, dhe kjo duhet të na shqetësojë të gjithëve”, shkruan ai.
Sipas Limajt, aleanca me Shtetet e Bashkuara është themeli i sigurisë, zhvillimit dhe të ardhmes së Kosovës. Çdo veprim që e dëmton këtë marrëdhënie konsiderohet kundër interesit kombëtar.
Ai u bën thirrje institucioneve të vendit për reflektim dhe kthim në rrugën e bashkëpunimit, transparencës dhe përgjegjësisë, duke kërkuar veprime urgjente për rikthimin e besimit dhe forcimin e partneritetit me SHBA-të. “Vetëm krah për krah me aleatët tanë euro-atlantikë mund të garantojmë një të ardhme të sigurt për Kosovën. Ky është detyrim ndaj qytetarëve tanë dhe sakrificës së brezit që na solli lirinë”, përfundon Limaj.
