Federata Shqiptare e Futbollit organizoi mbrëmjen e kaluar një darkë të veçantë në “Pallatin e Brigadave”, me pjesëmarrjen e krerëve më të lartë të futbollit europian, të cilët ndodheshin në Tiranë për mbledhjen e radhës të Komitetit Ekzekutiv të UEFA-s.
Gjatë darkës, Kryeministri Edi Rama i kërkoi Presidentit të UEFA-s, Aleksander Ceferin, që Superkupa e Evropës 2028 të zhvillohet në Shqipëri, duke vlerësuar progresin e infrastrukturës sportive dhe potencialin e vendit për të organizuar evente të mëdha ndërkombëtare.
Fjalët e Ceferin
Presidenti i UEFA-s, Aleksander Ceferin, përshëndeti mikpritjen e FSHF-së dhe Presidentit Armand Duka, duke nënvizuar zhvillimin e futbollit shqiptar:
“Futbolli bashkon njerëzit. Sporti duhet të jetë kundër dhunës dhe ndarjes. Jam i lumtur që Shqipëria po bashkë-organizon Europianin U-21 2027 së bashku me Serbinë dhe shoh mundësinë e ndeshjeve të ardhshme midis lojtarëve veteranë nga vendet e BE-së dhe ato që do t’i bashkohen së shpejti.”
Ceferin vlerësoi gjithashtu ndryshimet e dukshme në infrastrukturë dhe përpjekjet e Federatës Shqiptare të Futbollit për të ngritur standardet në vend.
Roli i Federatës Shqiptare të Futbollit
Presidenti Armand Duka falënderoi UEFA-n për besimin dhe mbështetjen, duke përmendur sukseset e fundit të futbollit shqiptar, përfshirë finalen e UEFA Europa Conference League dhe organizimin e Kampionatit Europian U-17. Ai nënvizoi rëndësinë e bashkëorganizimit të Europianit U-21 2027 dhe gatishmërinë e Shqipërisë për sfida të mëdha, përfshirë mundësinë e pritjes së finales së Superkupës së UEFA-s.
Duka:
“Shqipëria tashmë ka treguar se mund të presë evente të nivelit më të lartë dhe është e gatshme për sfida të tjera madhore, duke përfshirë edhe Superkupën e Evropës.”
Ky takim historik nënvizoi angazhimin e Shqipërisë për zhvillimin e futbollit dhe pozicionimin e vendit si një destinacion i besueshëm për kompeticione ndërkombëtare.
