Policia e Kosovës ka sekuestruar katër armë zjarri në tri raste të ndara që kanë ndodhur midis datave 11 dhe 13 shtator në komunat Ferizaj, Shtime dhe Kaçanik. Incidentet përfshijnë të shtëna me armë, posedim të paautorizuar dhe rrezikim të përgjithshëm.
Rasti i parë – Të shtëna me armë zjarri në Ferizaj, arrestohen tre persona
Më 11 shtator, rreth orës 20:11, policia ka reaguar pas një njoftimi për të shtëna me armë zjarri në rrugën “Ismet Ramadani” në Ferizaj. Gjatë ndërhyrjes së shpejtë, patrullat policore kanë arritur të arrestojnë tre persona të dyshuar. Tek dy prej tyre janë gjetur dhe sekuestruar dy armë zjarri, ndërsa në vendngjarje janë zbuluar 13 gëzhoja. Me urdhër të prokurorit të shtetit, të tre personat janë ndaluar për 48 orë për procedura të mëtejshme hetimore, nën dyshimet për “Shkaktim të rrezikut të përgjithshëm” dhe “Mbajtje të paautorizuar të armës”.
Rasti i dytë – Sekuestrohet një armë zjarri në Shtime
Po më 11 shtator, njësia e hetimeve në Lipjan ka njoftuar policinë në Shtime për një person të dyshuar nga fshati Zborc që mendohej se posedonte një armë zjarri në mënyrë të paautorizuar. Më 12 shtator, gjatë një kontrolli në banesën e të dyshuarit, është sekuestruar një pistoletë. I dyshuari është intervistuar dhe më pas është liruar në procedurë të rregullt, sipas vendimit të prokurorit.
Rasti i tretë – Të shtëna dhe sekuestrim i armës në Kaçanik
Më 13 shtator, rreth orës 00:25, policia e Kaçanikut ka marrë informacion për të shtëna me armë në fshatin Sllatinë. Sipas raportimeve, katër vetura ishin parë duke lëvizur me shpejtësi në drejtim të fshatit. Policia ka reaguar menjëherë dhe ka arritur të lokalizojë automjetet në oborrin e një vile. Gjatë kontrollit, tek një person është gjetur një armë zjarri, ndërsa në vendngjarje janë gjetur gjithashtu 8 gëzhoja. Prokurori i shtetit ka urdhëruar inicimin e rastit për “Mbajtje të paautorizuar të armës” dhe “Përdorim të armës”, ndërkohë që arma është sekuestruar.
