Shpenzimet ushtarake të Bashkimit Evropian kanë arritur në 381 miliardë euro, por më pak se një e treta e kësaj shume shkon për investime konkrete në sisteme të reja mbrojtjeje. Ndërkohë, realiteti i fushëbetejës tregon një disbalancë të madhe mes kostos së armëve të thjeshta ruse dhe sistemeve moderne të NATO-s.
Natën mes të martës dhe të mërkurës, qindra dronë rusë sulmuan Ukrainën, nga të cilët 19 arritën deri në hapësirën ajrore të Polonisë. Bëhet fjalë për modele të derivuara nga dronët iranianë Shahed, të përmirësuar nga përvoja e gati katër viteve luftë, me një kosto prodhimi që vlerësohet mes 20 deri 50 mijë euro për njësi.
Në anën tjetër, për të përballuar një kërcënim që në total nuk i kalon 1 milion euro, vendet e NATO-s vendosën sisteme mbrojtëse me kosto shumë më të lartë: avionë Awacs prej 300 milionë dollarësh, F-35 me vlerë mbi 100 milionë dollarë secili dhe madje edhe F-22 që arrijnë deri në 350 milionë dollarë për një njësi. Në total, burime që shkojnë mbi 1 miliard dollarë u përdorën për të neutralizuar vetëm disa dronë.
Sipas deklaratave të kryeministrit polak Donald Tusk, forcat e NATO-s nuk i kanë rrëzuar të gjithë dronët rusë, por vetëm ata që konsideroheshin “një kërcënim i drejtpërdrejtë” – rreth tre ose katër njësi. Analistët theksojnë se Moska, me një shpenzim minimal, arriti të testojë protokollet e mbrojtjes ajrore të NATO-s dhe të marrë një pasqyrë më të qartë mbi funksionimin e tyre.
Ky zhvillim ka ringjallur debatin nëse Europa tashmë shpenzon mjaftueshëm për mbrojtjen, apo nëse nevojiten investime të reja në kuadër të planeve të riarmatimit.
