Baseli ka arritur fitoren e katërt në këtë edicion të Superligës zvicerane, duke mposhtur Thunin me rezultatin 1-3, në ndeshjen e vlefshme për javën e gjashtë. Protagonistët absolutë të kuqebluve ishin futbollistët me origjinë shqiptare, Xherdan Shaqiri dhe Albion Ajeti, të cilët vulosën suksesin ndaj një rivali të fortë.
Në minutën e 24-të, Shaqiri zhbllokoi rezultatin me një goditje të saktë, ndërsa vetëm 17 minuta më vonë asistoi për Ajetin, i cili shënoi golin e dytë duke çuar Baselin në pushimin mes pjesëve me epërsi komode.
Thuni reagoi në pjesën e dytë dhe ngushtoi diferencën me anë të Bertones, i cili shënoi nga pika e bardhë në minutën e 51-të. Megjithatë, në fund ishte sërish Shaqiri ai që vulosi fitoren, duke realizuar nga penalltia në minutën 90+8.
Me këtë dopietë, Shaqiri ka shkuar në 4 gola dhe 3 asiste në 6 ndeshje kampionati, duke u konfirmuar si lider i padiskutueshëm i skuadrës. Nga ana tjetër, Ajeti regjistroi golin e tij të dytë sezonal me fanellën e Baselit.
