Zyrtarët amerikanë dhe kinezë do të zhvillojnë të dielën një raund të ri bisedimesh në kryeqytetin spanjoll, për të diskutuar çështjet tregtare të pezulluara prej kohësh, afatin e fundit për shitjen e aplikacionit kinez TikTok, si dhe kërkesat e SHBA-së që aleatët evropianë të vendosin tarifa ndaj Kinës për të frenuar blerjet e naftës ruse.
Ky takimi shënon herën e katërt në katër muaj që zyrtarët amerikanë, duke përfshirë Sekretarin e Thesarit, Scott Bessent, dhe Përfaqësuesin e Tregtisë, Jamieson Greer, takohen me Zëvendëskryeministrin kinez, He Lifeng, për të shmangur përkeqësimin e marrëdhënieve tregtare nën tarifat e vendosura nga administrata Trump.
Raundi i fundit i takimeve u mbajt në Stokholm në korrik, ku palët ranë dakord të zgjatnin për 90 ditë një armëpushim tregtar, duke ulur tarifat dhe rifilluar eksportet e mineraleve të rralla nga Kina në SHBA. Trump miratoi zgjatjen e tarifave ekzistuese deri më 10 nëntor.
Ekspertët paralajmërojnë se bisedimet e Madridit ka të ngjarë të sjellin kryesisht një zgjatje të afatit për TikTok, ndërsa një marrëveshje më e gjerë tregtare pritet të diskutohet në një takim të mundshëm mes Trump dhe presidentit kinez, Xi Jinping, më vonë këtë vit.
TikTok dhe shqetësimet e sigurisë
ByteDance, kompania kineze prapa TikTok, duhet të dorëzojë operacionet e saj në SHBA deri më 17 shtator, ose përballet me mbyllje. Afati pritet të zgjatet për të katërtën herë që nga fillimi i administratës Trump, pa pritshmëri për një marrëveshje përfundimtare. Qeveria amerikane ka kërkuar gjithashtu që TikTok të kalojë në pronësi amerikane për të reduktuar rreziqet e sigurisë kombëtare.
Presioni mbi naftën ruse
Bisedimet në Madrid do të përfshijnë edhe diskutime mbi ndalimin e blerjeve të naftës ruse dhe përdorimin e tarifave për të frenuar financimin e luftës së Moskës në Ukrainë. Zyrtarët amerikanë i kanë kërkuar aleatëve të G7 të bashkohen në vendosjen e tarifave për mallrat nga Kina dhe India që lidhen me naftën ruse.
Roli i Spanjës
Qeveria spanjolle po kërkon të shfrytëzojë këtë raund për të treguar veten si një vend strategjik për negociata ndërkombëtare. Ministri i Jashtëm, José Manuel Albares, do të mirëpresë publikisht delegacionet në Pallatin barok të Santa Cruz, duke shënuar përpjekjet e Spanjës për të forcuar marrëdhëniet dypalëshe me SHBA-në dhe rolin e saj në diplomacinë globale.
Bisedimet e Madridit mund të hedhin themelet për një marrëveshje më të gjerë tregtare mes dy ekonomive më të mëdha të botës, megjithatë, ekspertët paralajmërojnë se çështjet kryesore ekonomike dhe kërkesat për reforma strukturore nga Kina mund të zgjasin vite për t’u zgjidhur.
