Dogana e Kosovës ka bllokuar mbi 139 mijë produkte të falsifikuara gjatë muajve korrik dhe gusht 2025, si rezultat i kontrolleve të detajuara dhe analizës së riskut të kryera nga Zyrat e Brendshme Doganore të Departamentit Rajonal në Prishtinë.
Sipas njoftimit zyrtar, mallrat e sekuestruara mbartnin marka të njohura ndërkombëtare, ndërsa pas verifikimit rezultuan të jenë produkte të falsifikuara. Veprimet u zhvilluan në bashkëpunim me bartësit e së drejtës së autorit dhe pronësisë intelektuale.
Sasia e mallrave të ndaluara sipas zyrave doganore:
-
Prishtina 1 – 114,900 copë, përfshirë makina elektrike për fëmijë (BMW, Audi), aksesorë me logo (Mercedes, BMW, AMG, Audi), papuçe Gezer, llak flokësh Taft, aroma veture Areon dhe produkte tekstili (Louis Vuitton, Gucci, Chanel, Cos, Reebok).
-
Prishtina 2 – 15,720 copë, përfshirë mbathje dhe të brendshme me marka Adidas, Louis Vuitton, Miu Miu, Calvin Klein, Nike, Gucci, si dhe llak flokësh Taft.
-
Prishtina 3 – 7,738 copë, mes tyre mbathje me marka Nike, Adidas, Gucci, Louis Vuitton, Emboxx, Safety Shoes dhe makina elektrike për fëmijë Lamborghini.
-
Aeroporti i Prishtinës – 1,505 copë, përfshirë mbathje (Prada, Gucci, Louis Vuitton), bizhuteri (Miu Miu, Louis Vuitton, Gucci) dhe ambalazhe parfumesh të falsifikuara (Louis Vuitton).
Në total, janë 139,863 copë mallra të falsifikuara të ndaluara dhe trajtuara sipas procedurave ligjore.
Dogana e Kosovës ka theksuar se do të vazhdojë përpjekjet për të luftuar falsifikimin, kontrabandën dhe aktivitetet e tjera të paligjshme që dëmtojnë ekonominë dhe konsumatorët në vend.
