Instituti Kombëtar i Shëndetësisë Publike të Kosovës (IKSHPK) ka lëshuar një njoftim urgjent lidhur me cilësinë e ujit të pijshëm që furnizohet nga Liqeni i Badocit, duke paralajmëruar për praninë e manganit në nivele që tejkalojnë kufirin e lejuar.
Sipas analizave laboratorike të kryera gjatë periudhës 8–15 shtator 2025, në zonën PR03 – Badoc janë regjistruar këto vlera:
-
09.09.2025 – deri në 0.429 mg/L në Rr. Hyzri Talla
-
11.09.2025 – deri në 0.449 mg/L në Rr. Muharrem Fejza
-
15.09.2025 – 0.117 mg/L në Rr. Enver Maloku
Këto përqendrime janë shumë më të larta se kufiri i lejuar prej 0.05 mg/L, i përcaktuar me Udhëzimin Administrativ Nr. 10/2021 për cilësinë e ujit për konsum nga njeriu.
📌 Rekomandimi i IKSHPK-së:
-
Uji nga Liqeni i Badocit nuk duhet të përdoret për pije deri në njoftimin e radhës.
-
Mund të përdoret vetëm për pastrim, mirëmbajtje higjienike personale dhe të hapësirave të banimit.
IKSHPK siguron se do të vazhdojë monitorimin dhe do të informojë me kohë qytetarët për çdo zhvillim të ri.
Ky paralajmërim prek një numër të madh banorësh të Prishtinës që furnizohen nga Fabrika e Ujit në Badoc.
