Forcat Ajrore Mbretërore Britanike (RAF) kanë ndërmarrë një mision të posaçëm mbrojtës të NATO-s mbi hapësirën ajrore të Polonisë, në kuadër të reagimit aleat ndaj shkeljeve të përsëritura nga dronët rusë, ka konfirmuar Ministria britanike e Mbrojtjes.
Dy avionë luftarakë RAF Typhoon u ngritën të premten mbrëma nga baza RAF Coningsby në Lincolnshire dhe patrulluan qiellin polak, të mbështetur nga një avion furnizues RAF Voyager. Pas përfundimit të operacionit, ata u kthyen në Mbretërinë e Bashkuar në orët e para të së shtunës, raporton BBC.
Misioni, i koduar si “Eastern Sentry”, synon forcimin e krahut lindor të aleancës pas 19 shkeljeve të hapësirës ajrore polake nga dronët rusë që prej fillimit të muajit.
Tensionet janë rritur ndjeshëm, pasi veprime të ngjashme janë regjistruar edhe në Rumani dhe Estoni, megjithëse Moska ka mohuar përfshirjen.
Ministri britanik i Mbrojtjes, John Healey, tha se ky operacion dërgon një “sinjal të qartë se hapësira ajrore e NATO-s do të mbrohet”, duke theksuar krenarinë për pilotët dhe ekuipazhin britanik që realizuan me sukses misionin.
