Kryeministri britanik Sir Keir Starmer pritet të shpallë këtë të diel njohjen zyrtare të shtetit palestinez, në një deklaratë që do të publikohet pasditen e sotme, raporton BBC.
Ky veprim shënon një kthesë të madhe në politikën e jashtme të Mbretërisë së Bashkuar, pasi qeveritë e mëparshme kishin theksuar se njohja e Palestinës do të ndodhte vetëm si pjesë e një procesi paqeje dhe në një moment me ndikim maksimal diplomatik.
Deklarata pason paralajmërimet e Starmer në korrik, kur ai tha se Britania do të rishikonte qëndrimin nëse Izraeli nuk do të pranonte një armëpushim në Gaza dhe një proces paqeje drejt zgjidhjes me dy shtete.
Vendimi ka shkaktuar reagime të ashpra nga qeveria izraelite, nga familjet e pengjeve në Gaza dhe nga deputetë konservatorë britanikë. Kryeministri izraelit Benjamin Netanyahu e ka cilësuar këtë hap si një akt që “shpërblen terrorizmin”.
Sipas burimeve qeveritare britanike, përkeqësimi i situatës humanitare në Gaza – me imazhe të urisë dhe dhunës – e ka bërë të domosdoshme këtë veprim. Ministrat britanikë theksojnë se vendi ka një përgjegjësi morale për të dërguar një sinjal të qartë mbi nevojën e një zgjidhjeje të drejtë dhe të qëndrueshme për konfliktin izraelito-palestinez.
