Portugalia ka njohur zyrtarisht shtetin palestinez, njoftoi të dielën në Nju Jork Ministri i Punëve të Jashtme, Paulo Rangel. Ai deklaroi se një zgjidhje me dy shtete është “e vetmja rrugë drejt një paqeje të drejtë dhe të qëndrueshme”.
Qeveria portugeze ka riafirmuar gjithashtu “të drejtën e Izraelit për të ekzistuar” dhe nevojat e tij të sigurisë, duke dënuar njëkohësisht “sulmet e tmerrshme terroriste të 7 tetorit” të kryera nga Hamasi.
Lëvizja e Lisbonës erdhi vetëm disa orë pasi Mbretëria e Bashkuar, Kanadaja dhe Australia – vende anëtare të Komonuelthit – bënë të njëjtin hap, në prag të Asamblesë së Përgjithshme të OKB-së që hapet të martën. Kryeministri britanik Keir Starmer theksoi se përpjekjet ndërkombëtare duhet të përqendrohen në “lirimin e pengjeve, fundin e dhunës dhe një zgjidhje me dy shtete si shpresa më e mirë për paqe dhe siguri”.
Franca pritet të jetë vendi i radhës që do t’i bashkohet listës së mbi 150 shteteve që tashmë e kanë njohur Palestinën.
Nga ana tjetër, Izraeli e dënoi ashpër vendimin. Kryeministri Benjamin Netanyahu paralajmëroi se ky hap do të destabilizojë rajonin dhe do të inkurajojë Hamasin. Ministri izraelit i Sigurisë Kombëtare, Itamar Ben-Gvir, paralajmëroi kundërmasa, duke përfshirë ngritjen e çështjes së aneksimit të Bregut Perëndimor në kabinetin izraelit.
