Kolegji i Gjykatës Supreme ka refuzuar si të pathemeltë ankesën e paraqitur nga Lëvizja Vetëvendosje (LVV), e cila kontestonte vendimin e Panelit Zgjedhor për Ankesa dhe Parashtresa (PZAP) lidhur me zgjedhjet lokale.
Me aktgjykimin AA.nr.82/2025, Gjykata Supreme ka lënë në fuqi vendimin e PZAP-it (ZL.Anr.37/2025, i datës 17 shtator 2025), me të cilin ishte refuzuar si e pabazuar ankesa e LVV-së kundër subjektit politik Lista Serbe.
Vetëvendosje kishte pretenduar se Lista Serbe kishte shkelur Kodin e Mirësjelljes për Subjektet Politike, Mbështetësit e tyre dhe Kandidatët gjatë fushatës për zgjedhjet lokale që do të mbahen më 12 tetor 2025.
Pas shqyrtimit të shkresave të lëndës dhe vlerësimit të ligjshmërisë së vendimit të PZAP-it, Gjykata Supreme konstatoi se ankesa e LVV-së është e pathemeltë.
👉 Aktgjykimin e plotë mund ta lexoni këtu: AA.nr.82/2025
