Greqia po përjeton një nga skandalet më të mëdha të dekadës, i pagëzuar tashmë si “Watergate-i grek”, pas zbulimeve se telefona të politikanëve, gjyqtarëve, gazetarëve dhe ushtarakëve janë përgjuar përmes softuerit të paligjshëm spiun Predator dhe nga vetë Shërbimi Informativ Kombëtar (EYP), raporton BBC.
Kryeministri Kyriakos Mitsotakis e ka quajtur ngjarjen një skandal, por deri më tani asnjë zyrtar i qeverisë nuk është përballur me akuza penale. Kritikët e akuzojnë ekzekutivin për përpjekje për ta mbuluar rastin.
Të mërkurën, një gjyqtar do të shqyrtojë akuzat ndaj dy izraelitëve dhe dy grekëve të dyshuar për përfshirje në marketingun e softuerit Predator, i shpërndarë nga kompania izraelite Intellexa, me bazë në Athinë.
Si shpërtheu skandali
Çështja doli në dritë në verën e vitit 2022, kur Nikos Androulakis, tani kryetar i Partisë Socialiste (PASOK), mori një njoftim nga IT-ja e Parlamentit Evropian se telefoni i tij kishte marrë një mesazh të dyshimtë me malware të tipit Predator.
Ky softuer lejon akses në mesazhe, kamerë dhe mikrofon, duke e kthyer telefonin në një mjet spiunimi.
Më pas, Androulakis mësoi se ishte vëzhguar paralelisht edhe nga vetë EYP, e cila kishte justifikuar veprimin me “arsye sigurie kombëtare”.
Përgjegjësia politike dhe dorëheqjet
Vetëm pak muaj pasi mori pushtetin në vitin 2019, Mitsotakis e vendosi EYP nën mbikëqyrjen e drejtpërdrejtë të zyrës së tij. Pas shpërthimit të skandalit, drejtori i EYP Panagiotis Kontoleon dhe këshilltari i afërt i kryeministrit, Grigoris Dimitriadis – gjithashtu nip i tij – dhanë dorëheqje.
Shtrirja e përgjimeve
Sipas Autoritetit Grek për Mbrojtjen e të Dhënave Personale, të paktën 87 persona janë përgjuar me Predator, ndërsa 27 prej tyre janë ndjekur njëkohësisht edhe nga EYP. Mes tyre ka ministra në detyrë dhe drejtues të lartë të ushtrisë.
