Instituti Kombëtar i Shëndetësisë Publike të Kosovës (IKSHPK) ka njoftuar se mostrat e fundit të ujit të pijshëm nga rrjeti shpërndarës në zonën e furnizimit PR03–Badoc tregojnë një ulje të ndjeshme të nivelit të manganit.
Sipas matjeve laboratorike, vlerat maksimale të regjistruara arritën në 0.067 mg/L, çka është dukshëm më e ulët se standardi shëndetësor prej 0.3 mg/L – prag mbi të cilin mund të ketë ndikim në shëndetin e njeriut. Megjithatë, niveli i regjistruar vazhdon të tejkalojë normën e lejuar sipas Udhëzimit Administrativ nr. 10/2021, i cili përcakton kufirin prej 0.05 mg/L për manganin në ujin e destinuar për konsum njerëzor.
Rekomandimi i IKSHPK
Pavarësisht përmirësimit, IKSHPK thekson se uji në këtë zonë ende nuk është i sigurt për konsum dhe rekomandon qytetarët që të mos e përdorin për pije derisa të sigurohen rezultatet përfundimtare.
Monitorimi i vazhdueshëm
Instituti ka bërë të ditur se do të vijojë me monitorimin e rregullt të cilësisë së ujit dhe se çdo zhvillim i ri do të komunikohet me qytetarët në kohë.
