Policia e Kosovës ka arrestuar tre persona në Vushtrri, të dyshuar për veprën penale “Organizim i skemave piramidale dhe bixhozit të paligjshëm”.
Arrestimi u bë pasditen e së martës, mbi bazën e provave dhe dyshimeve të arsyeshme se brenda një lokali po zhvillohej veprimtari e kundërligjshme e lojërave të fatit.
Gjatë kontrollit të kryer nga policia, në cilësi të provave materiale u sekuestruan tre telefona, një shumë prej 525 eurosh, tiketa si dhe dëshmi të tjera relevante.
Pas intervistimit të të dyshuarve dhe me vendim të prokurorit të rastit, atyre u është caktuar masa e ndalimit prej 48 orësh. Ndaj tyre është iniciuar procedurë për veprën penale “Organizim i skemave piramidale dhe bixhozit të paligjshëm”.
