Presidenti i Shteteve të Bashkuara, Donald Trump, ka deklaruar se Izraeli nuk do të lejohet të aneksojë Bregun Perëndimor të pushtuar, duke u vendosur kështu në kundërshtim të hapur me kryeministrin izraelit Benjamin Netanyahu dhe ministrat ultranacionalistë të qeverisë së tij, të cilët prej kohësh shtyjnë për këtë plan.
Deklarata u bë të enjten para gazetarëve në prag të mbërritjes së Netanyahut në Nju Jork, ku pritet të flasë sot në Asamblenë e Përgjithshme të Kombeve të Bashkuara. I pyetur nëse kishte diskutuar për këtë çështje me kryeministrin izraelit, Trump nuk dha një përgjigje të prerë, por theksoi:
“Po, por nuk do ta lejoj. Pavarësisht nëse fola me të apo jo, nuk po e lejoj Izraelin të aneksojë Bregun Perëndimor. Ka pasur mjaft. Është koha të ndalemi tani”.
Megjithatë, Trump nuk specifikoi se çfarë masash do të ndërmerrte për të parandaluar aneksimin. Analistët paralajmërojnë se qëndrimi i tij mund të ndryshojë, duke e cilësuar këtë si një pozicionim të paqëndrueshëm.
Mouin Rabbani, analist në Qendrën për Studime të Konfliktit dhe Humanitare me seli në Katar, i tha Al Jazeera se deklarata e Trump është një zhvillim “pozitiv”, por shtoi se “njeriu i jep vlerë fjalëve të Trump me rrezikun e vet”.
Ky qëndrim i presidentit amerikan pritet ta vërë administratën e tij në një kurs përplasjeje me qeverinë izraelite të udhëhequr nga Netanyahu. Ministri i Financave, Bezalel Smotrich, i cili vetë jeton në një vendbanim të paligjshëm, ka qenë promotori kryesor i planit të aneksimit. Ai ka kundërshtuar gjithashtu çdo marrëveshje për t’i dhënë fund luftës në Gaza, duke kërcënuar rrëzimin e qeverisë nëse një marrëveshje e tillë arrihet.
Ndërkohë, Smotrich ka prezantuar plane për zgjerimin e vendbanimeve në mijëra shtëpi të reja në Bregun Perëndimor – një hap që, sipas tij, do të “varrosë përfundimisht” idenë e shtetit palestinez.
Kujtojmë se në korrik 2024, Gjykata Ndërkombëtare e Drejtësisë vendosi se vendbanimet izraelite në Bregun Perëndimor janë të paligjshme dhe duhet të ndërpriten, duke kërkuar kthimin e tokës te palestinezët.
