Presidenti i SHBA-së, Donald Trump, ka nënshkruar një urdhër ekzekutiv që përshpejton planin për shitjen e operacioneve amerikane të TikTok tek investitorë amerikanë dhe ndërkombëtarë, duke e vlerësuar kompaninë e re në 14 miliardë dollarë. Ky hap synon të adresojë shqetësimet e sigurisë kombëtare të ngritura në ligjin e vitit 2024.Sipas zëvendëspresidentit JD Vance, kompania e re do të menaxhohet nga investitorë amerikanë dhe globalë, ndërsa vlera prej 14 miliardë dollarësh është shumë më e ulët se parashikimet e analistëve, të cilët e vlerësonin TikTok-un në 30 deri 40 miliardë dollarë vetëm në SHBA.
Trump shtyu deri më 20 janar zbatimin e ndalimit të TikTok-ut nëse ByteDance, kompania mëmë kineze, nuk arrin ta shesë atë. Një çështje ende e paqartë është përdorimi i algoritmit të rekomandimeve, aseti kryesor i platformës.
“Donim ta mbanim TikTok-un funksional, por gjithashtu të siguronim privatësinë e të dhënave të amerikanëve”, tha Vance në një konferencë për shtyp në Zyrën Ovale.
Trump konfirmoi se kishte biseduar me Presidentin kinez Xi Jinping, i cili, sipas tij, kishte dhënë “miratim verbal” për planin. Megjithatë, ambasada kineze në Uashington dhe kompania TikTok nuk kanë komentuar ende.Sipas mediave kineze, ByteDance do të krijojë një kompani të re në SHBA, e cila do të menaxhojë tregtinë elektronike, operacionet e markave dhe lidhjet me tregjet ndërkombëtare. Njëkohësisht, ajo do të jetë përgjegjëse për sigurinë dixhitale amerikane, përfshirë përmbajtjen dhe softuerin.Analistë si Alan Rozenshtein nga Universiteti i Minesotës paralajmërojnë se ende nuk është e qartë nëse ByteDance do të ruajë kontroll mbi algoritmin. “Presidenti e ka certifikuar marrëveshjen, por nuk ka dhënë detaje mbi algoritmin, që është çështja kryesore,” tha ai.Një grup investitorësh, përfshirë Oracle dhe firmën e kapitalit privat Silver Lake, pritet të zotërojnë afërsisht 50% të aksioneve të TikTok U.S.. Ndërkohë, investitorët ekzistues të ByteDance – si Susquehanna International Group, General Atlantic dhe KKR – do të mbajnë rreth 30%.
Megjithatë, burime pranë marrëveshjes paralajmërojnë se pjesët e pronësisë mund të ndryshojnë, duke pasur parasysh interesin e madh të investitorëve.ByteDance e vlerëson veten në mbi 330 miliardë dollarë, sipas planeve të saj të fundit të blerjes së aksioneve nga punonjësit. Kjo ngre pikëpyetje të mëdha mbi vlerësimin relativisht të ulët prej 14 miliardë dollarësh për operacionet amerikane të TikTok-ut.
