Kryeministri në detyrë i Republikës së Kosovës, Albin Kurti, gjatë qëndrimit në SHBA ka bërë homazhe pranë varrezave të vëllezërve Bytyqi në New York, të cilët u vranë 26 vjet më parë nga forcat serbe.
Kurti ishte i shoqëruar nga zëvendësministrja për Punë të Jashtme dhe Diasporës, Liza Gashi, dhe konsulli i përgjithshëm i Kosovës, ambasadori Blerim Reka. Ata vendosën lule të freskëta në nderim të Yllit, Agronit dhe Mehmet Bytyqit, pjesëtarë të njësitit të vullnetarëve “Atlantiku” të Ushtrisë Çlirimtare të Kosovës.
“Duke i kujtuar dëshmorët e kombit, ne ia përkujtojmë vetes sonë çmimin e lartë që kemi paguar për lirinë që gëzojmë. Ideali i tyre na shërben si udhërrëfyes për të ecur përpara. Yllin, Agronin dhe Mehmetin do t’i kujtojmë përgjithmonë dhe këtë amanet duhet ta mbajnë edhe brezat e ardhshëm”, tha Kurti.
Vëllezërit Bytyqi u arrestuan në qershor të vitit 1999 nga policia serbe, pasi kaluan paqëllim kufirin gjatë një udhëtimi humanitar për të ndihmuar një familje rome nga Prizreni. Pas përfundimit të dënimit me burgim prej 15 ditësh, ata u ekzekutuan në një bazë të policisë serbe dhe trupat e tyre u gjetën më vonë në një varrezë masive në Petrovo Sello.
Në vitin 2019 dhe 2022, Dhoma e Përfaqësuesve e Kongresit Amerikan miratoi dy rezoluta ku kërkoi nga Serbia bashkëpunim me drejtësinë ndërkombëtare për të nxjerrë para ligjit përgjegjësit e këtij krimi.
Lavdi Yll, Agron dhe Mehmet Bytyqit, si dhe të gjithë dëshmorëve të kombit shqiptar!
