Presidenti amerikan Donald Trump ka propozuar ish-kryeministrin britanik, Tony Blair, si anëtar të vetëm të “Bordit të Paqes” – një organ që do të mbikëqyrë qeverisjen dhe rindërtimin e Gazës.
Trump e cilësoi Blairin si një “njeri të mirë”, ndërsa ish-kryeministri britanik reagoi menjëherë me një deklaratë të shkruar, ku e përshëndeti këtë iniciativë.
Deklarata e Blair:
“Presidenti Trump paraqiti një plan guximtar dhe të mençur, i cili, nëse miratohet, mund të përfundojë luftën, të sjellë lehtësim të menjëhershëm në Gaza dhe një të ardhme më të ndritur për popullin e saj. Ky plan garanton gjithashtu sigurinë absolute të Izraelit dhe lirimin e të gjitha pengjeve”, tha Blair.
Ai shtoi se ky është “shansi më i mirë për t’i dhënë fund dy viteve të luftës, vuajtjes dhe dhimbjes”, duke falënderuar Trumpin për “lidershipin, vendosmërinë dhe angazhimin e tij”.
Blair vlerësoi veçanërisht gatishmërinë e Trump për të marrë drejtimin e Bordit të Paqes:
“Ky është një mesazh i fuqishëm mbështetjeje dhe besimi për të ardhmen e Gazës, për aftësinë e izraelitëve dhe palestinezëve për të gjetur një rrugë drejt paqes dhe për potencialin e një aleance më të gjerë rajonale e globale kundër ekstremizmit.”
Iniciativa e Trump dhe mbështetja e Blair pritet të hapin një kapitull të ri diplomatik për të ardhmen e Gazës, mes shpresës për paqe dhe sfidave të shumta në rajon.
